Qeveria e Malit të Zi vazhdon të punojë edhe më intensivisht me qëllim të përmbushjes së të gjitha obligimeve të përcaktuara me agjendën evropiane, tha sekretari shtetëror në Ministrinë e Çështjeve Evropiane, Bojan Bozhoviq.

“Ne kemi përfunduar një pjesë të madhe të detyrimeve më kërkuese nga kapitujt 23 dhe 24, të cilat, jam i bindur se do të kontribuojnë ndjeshëm në përmbushjen e standardeve përfundimtare në kapitujt e tjerë të negociatave dhe do të përshpejtojnë rrugën drejt mbylljes së përkohshme të tyre”, tha Bozhoviq.

Ai sot hapi mbledhjen e 17-të të Nënkomitetit për Tregti, Industri, Dogana dhe Tatime ndërmjet BE-së dhe Malit të Zi.

Bozhoviq falënderoi Komisionin Evropian për angazhimin e tij të vazhdueshëm, i cili kontribuon dukshëm që Mali i Zi të bëhet anëtari i ardhshëm i Bashkimit Evropian.

Duke folur për fushat që janë pjesë e këtij Nënkomiteti, të cilat i referohen kapitujve 1. Liria e lëvizjes së mallrave, 16. Taksat, 20. Ndërmarrësia dhe politika industriale, 29. Bashkimi doganor dhe 30. Marrëdhëniet me jashtë, Bozhoviq tha se me këto aktivitete janë duke u zhvilluar dinamika të përshpejtuara dhe se Mali i Zi punon me përkushtim në harmonizimin dhe zbatimin e mëtejshëm të rregulloreve të miratuara.

Ai shprehu besimin e tij se përveç kapitullit 30. Marrëdhëniet me jashtë, i cili është mbyllur përkohësisht, Mali i Zi vëren një vullnet të mirë të brendshëm që së shpejti të mbyllë përkohësisht kapitujt 1. Lëvizja e lirë e mallrave dhe 20. Politika sipërmarrëse dhe industriale.