25.5 mln euro janë investuar nga Bashkimi Europian në bashkëpunimim me qeverinë gjermane dhe atë zvicerane për sektorin e ujit të pijshëm për zonën e Kamzës. Në lançimin e këtij programi kreu i delegacionit të BE-së në Shqipëri, Luigi Soreca tha se ky është programi më i madh i BE-së për Shqipërinë përveç rindërtimit, që do të ketë ndikim thelbësor për këtë sektor. Në fjalën e tij ambasadori ka thënë: “është shembull i mënyrës si funksionon BE-ja. Jemi bërë bashkë për të trajtuar sektorin e ujërave të zeza, ka ambicien për të dhënë një ndikim rrënjësor për sektorin. Do ta ndihmojë Shqipërinë të afrohet me BE-në me standardet e BE-së në fushën e ujit dhe ujërave të zeza”. Duke qenë se politikat e mjedisit e klimës janë prioritete të BE-së, Soreca i bëri thirrje Shqipërisë që të ketë mjedisin përparësi, në mënyrë që këto investime të japin fryte. “Politikat e mjedisit e klimës janë prioritete të BE-së. Ne jemi udhëheqës për mbrojtjen e mjedisit, mbështetet nga agjenda e gjelbër. 1/3 e këtij investimi fokusohet në trajtimin e ujërave të zeza. 210 mln euro për projekte, mjedisin, klimën e standardet mjedisore dhe 60 milionë euro të tjera gjatë viteve të tjera dhe të gjithë këto veprime shoqërojnë Shqipërinë në trajnimin e stafit, mbështetjen e bashkive e organizatave me qëllim mbrojtjen e biodiversitetit. Por të gjitha këto nuk do të japim fryte nëse Shqipëria nuk e vë mjedisin në përparësi të saj. Mjedisi duhet të mbrohet dhe duhet komunikuar për të gjitha ato gjëra që janë të rëndësishme që Shqipëria të jetë më e gjelbër dhe më e begatë”, tha midis të tjerash Soreca .