Kryetari i Organizatës Ndërkombëtare të Policisë së Malit të Zi, Ivan Pekiq, ka bërë të ditur se prokuroria dhe Drejtoria e Policisë janë në lëvizje për të kontaktuar drejtorët që kanë organizuar blerjen e pajisjeve intervenuese të sekuestruara tani dhe për të sqaruar se për çfarë qëllimi kanë planifikuar ta përdorin atë. Ai tha për Portalin RTCG se pajisjet e gjetura ishin të mjaftueshme për të shkaktuar trazira dhe rrëmujë në shtet dhe në institucionet e sistemit.

Pekiq vlerëson se situata politike dhe e sigurisë në Mal të Zi është gjithnjë e më komplekse.

“Qeveria në mandatin e saj teknik po humb forcën në luftën kundër krimit të organizuar, jemi në prag të qeverisë së 44-të dhe në qendër të Podgoricës u gjetën pajisje për shkaktimin e trazirave, të cilat me ligj përdoren vetëm nga shërbimet e sigurisë. Situata është e ngjashme me atë të vitit 2015, vetëm tani nuk i dimë aktorët. Ajo që krijon dyshime është se lind pyetja logjike se kush i ka marrë pajisjet intervenuese dhe i ka fshehur në bodrumin e një objekti në qendër të Podgoricës”, tha ai për Shërbimin Publik.

Ai thekson se është shumë e rëndësishme dhe urgjente zbulimi i organizatorëve, arrestimi i tyre dhe shqyrtimi i synimeve të tyre në lidhje me pajisjet e ndërhyrjes, të cilat, kujton ai, mund të përdoren ligjërisht vetëm nga Drejtoria e Policisë dhe Ushtria e Malit të Zi.

Kryeministri Dritan Abazovic ka deklaruar mbrëmë se pret një reagim nga prokurori për pajisjet e gjetura në hotelin “Podgorica”. Ai po ashtu tha se veturat e sekuestruara nga Ranko Uboviq në afërsi të hotelit “Podgorica” janë përdorur me vite nga njësia policore për të luftuar krimin e organizuar. Ai ka treguar se bëhet fjalë për vetura me targa “123”.

Policia gjatë bastisjes në hotelin ‘Podgorica’ ka kontrolluar dhe identifikuar ish-policin Zoran Llazoviq dhe biznesmenin Ranko Uboviq, si dhe mysafirë të tjerë, por askush nuk është arrestuar. Policia ka konfiskuar disa automjete të parkuara në afërsi të hotelit për kontroll.

Bastisja e djeshme është nisur pasi një ditë më parë, në një godinë zyrash ngjitur me hotelin “Podgorica”, janë gjetur armë, pajisje pioteknike, jelek antiplumb dhe shkopinj.