Komisioneri Evropian për Zgjerim Oliver Varhelji, prezantoi sot para komisionit për politikë të jashtme raportet për vendet që aspirojnë të jenë anëtare të bllokut. Lidhur me Malin e Zi, përmbushja e kritereve të përkohshme nga kapitujt 23 dhe 24 është prioritet në procesin e mëtejshëm të para-anëtarësimit drejt Bashkimit Evropian (BE). “Për ta arritur këtë, Mali i Zi duhet të intensifikojë përpjekjet e tij në zgjidhjen e çështjeve të pazgjidhura, duke përfshirë ato si liria e shprehjes dhe liria e medias, lufta kundër korrupsionit dhe krimit të organizuar,” tha Varhelji. Ai, duke prezantuar pakon e zgjerimit në Komisionin për Politikë të Jashtme të Parlamentit Evropian, tha se Komisioni Evropian i ka dhënë Malit të Zi të njëjtin vlerësim edhe vitin e kaluar, por se këto çështje ende janë shqetësuese. Varhelji theksoi se nevojiten hapa të mëtejshëm në drejtim të reformave thelbësore, duke përfshirë këtu emërimin e gjyqtarëve të Gjykatës Kushtetuese. “Prandaj, ndërtimi i një konsensusi të të gjithë aktorëve politikë dhe një administrate publike funksionale për zbatimin e reformës publike janë të një rëndësie kyçe”, tha ndër të tjera Varhelji.