Ndonëse rreziku i kollës së mirë ekziston, dhe autoritetet bëjnë thirrje për vaksinim, dhoma e pritjes në Shtëpinë Shëndetësore të Podgoricës, e cila organizoi vaksinimin urgjent në turnin e pasdites, dukej mjaft e zbrazët.

As në mëngjes nuk kishte shumë fëmijë dhe Ivana Lakiçeviq, pediatre në Qendrën Shëndetësore, tha se ishte ende dita e parë, kështu që ndoshta prindërit nuk ishin aq të informuar.

“Nuk janë informuar me kohë, ndaj presim që në ditët në vijim të ketë më shumë. Sigurisht që prindërit mund të kontaktojnë pediatrin e përzgjedhur ku janë regjistruar fëmijët e tyre”, tha ajo.

Kolla e mirë mund të parandalohet me vaksinim, sepse foshnjat dhe fëmijët e vegjël janë më të ndjeshëm.

Larja e duarve dhe mbajtja e maskave rekomandohet nga epidemiologët në mënyrë që sëmundja të mos përhapet në mjedisin e shtëpisë.

Deri më tani janë konfirmuar 22 raste me kollë të mirë, ndërsa tetë janë duke iu nënshtruar analizave laboratorike. Megjithatë, të dhënat nga terreni tregojnë për epidemiologët se numri i të infektuarve është shumë më i lartë.