Sonte në Vilën Gorica u mbajt mbledhja e Këshillit për Mbrojtje dhe Siguri, e kryesuar nga Presidenti I Malit të Zi Millo Gjukanoviq.
Në këtë mbledhje morën pjesë edhe anëtarët e Këshillit: Kryetari i Kuvendit Aleksa Beçiq, Kryeministri Zdravko Krivokapiq, Ministrja e Mbrojtjes Olivera Injac, Ministri i Brendshëm Sergej Sekulloviq dhe Drejtori i Agjensisë së Sigurisë Kombëtare Dejan Vukshiq.
Me rastin e sfidave të sigurisë të inicuara nga shpallja e datës së kurorëzimi te Mitropolitit të Kishes Ortodokse Serbe, Joanikije, sot nga mbledhja e Këshillit u kanë bërë thirrje të gjithë akterëve socio-politikë për paqe, përmbajtje, tolerancë, mirëkuptim, respekt dhe vlerësim reciprok, si dhe respekt ndaj Kushtetutës dhe ligjeve të Malit të Zi. Këshilli, siç u tha nga kabineti i kryetarit Gjukanoviq, poashtu pret që organet kompetente shtetërore të kryejnë të gjitha aktivitetet e nevojshme për të siguruar paqen dhe sigurinë e çdo qytetari, si dhe respektimin e të drejtave të njeriut dhe lirive fetare. Këshilli për mbrojtje dhe siguri pret që Këshilli i Sigurisë Kombëtarë të vazhdojë të koordinojë dhe drejtojë në mënyrë të vazhdueshme sektorin e inteligjencës dhe sigurisë, të rishikojë situatën e sigurisë dhe të nxjerrë përfundime dhe udhëzime në lidhje me punën e organeve që përbëjnë sektorin e inteligjencës dhe sigurisë dhe Byronë për Koordinimin Operacional.
Gjatë takimit anëtarët e Këshillit u informuan mbi situatën dhe gjendjen e zjarreve në Mal të Zi dhe arritën në një përfundim mbi nevojën për përmirësimin e mëtejshëm të kapaciteteve, trajnimin profesional dhe zhvillimin e personelit, si dhe investimin në modernizimin e pajisjeve dhe burimeve në sistemin e mbrojtjes dhe shpëtimit.
Këshilli i Mbrojtjes dhe Sigurisë poashtu i përcaktoi Rregullat e Angazhimit dhe Kufizimet Kombëtare të Pjesëtarëve të Ushtrisë së Malit të Zi mbi pjesëmarrjen e tyre në misionin e KFOR -it në Republikën e Kosovës.
Në seancën e sotme, Këshilli për Mbrojtjen dhe Sigurinë shqyrtoi edhe çështje të tjera në kompetencën e tij dhe, me propozimin e Ministres së Mbrojtjes, mori vendime për shkarkimet dhe emërimet e oficerëve të Ushtrisë së Malit të Zi, thuhet në deklaratën e kabinetit të kryetarit Gjukanoviq.
Ilmira Lika
