Sot në Kuvendin e Malit të Zi do të mbahet seanca e parë e Komisionit për monitorimin e zbatimit të Marrëveshjes për kushtet për mbajtjen e regjistrimit të popullsisë, amvisërive dhe banesave, si dhe monitorimin e zbatimit të procesit të regjistrimit.

Kujtojmë se ky komision parlamentar ka 14 anëtarë – nga shtatë nga shumica parlamentare dhe opozita.

Bashkëkryetarë u zgjodhën Darko Dragoviq nga Lëvizja Evropa Tani (PES) dhe Nikolla Rakoçeviq (Partia Demokratike e Socialistëve).

Anëtarët e komisionit nga qeveria janë Jovan Vuçuroviq (NSD), Sllagjana Kallugjeroviq (SNP), Gordan Stojoviq (PES), Nikolla Camaj (Forumi Shqiptar), Nikolla Rovçanin (Demokratët), Vlladisllav Bojoviq (DNP). Opozita përfaqësohet nga Nikolla Zirojeviq (SD), Damir Gutiq (BS), Vlladimir Dobriçanin (Mali i Zi i Bashkuar), Jevto Erakoviq (DPS), Adrijan Vuksanoviq (HGI) dhe Filip Axhiq (GP URA).

Regjistrimi i popullsisë, amvisërive dhe banesave në Mal të Zi, pas dy vonesave, ka nisur dje dhe duhet të zgjasë deri më 18 dhjetor.