Presidenti i Malit të Zi, Jakov Millatoviq, pranoi letrat kredenciale nga ambasadorët e sapoemëruar të jashtëzakonshëm dhe fuqiplotë, Zhaklina Peto, ambasadore e Republikës së Shqipërisë, Ragnar Almqvist, ambasador i Irlandës dhe Niklas Lindqvist, ambasador i Finlandës.

Siç njoftoi kabineti i tij, në bisedimet e ndara me ambasadorët në rezidencën në Cetinë, presidenti Millatoviq u ka uruar atyre mirëseardhjen në Mal të Zi dhe një mision të suksesshëm diplomatik me qëllim të forcimit të mëtejshëm të marrëdhënieve dypalëshe ndërmjet dy vendeve.

U konstatuan marrëdhënie të mira dhe miqësore mes Malit të Zi dhe vendeve që përfaqësojnë, të cilat u vlerësuan si bazë për intensifikimin e bashkëpunimit dypalësh.

Siç u tha, kreu i shtetit në mënyrë specifike vuri në dukje qëllimet themelore strategjike.

Presidenti malazez i njohu ambasadorët me situatën aktuale në vend si dhe qëllimet themelore strategjike të anëtarësimit të Malit të Zi në Bashkimin Evropian, forcimin e besueshmërisë në aleancën e NATO-s dhe marrëdhëniet e mira fqinjësore.