Millatoviq: Mali i Zi mbetet i përkushtuar për forcimin e marrëdhënieve me Zvicrën
Prej tvteuta13:42, 24 Maj 2024
![](http://tvteuta.com/wp-content/uploads/2024/05/sssss_599x900.jpg)
Presidenti i vendit, Jakov Millatoviq, priti ministrin e Punëve të Jashtme të Zvicrës, Ignacio Kasis, i cili përfaqëson vizitën e parë zyrtare të një zyrtari zviceran në Mal të Zi. Me atë rast, presidenti theksoi se Mali i Zi mbetet i përkushtuar për forcimin e mëtejshëm të marrëdhënieve me Zvicrën, si një vend që ruan traditën shekullore të vlerave evropiane dhe demokratike.
“Ai gjithashtu vuri në dukje rëndësinë e bashkëpunimit thelbësor ekonomik ndërmjet dy vendeve, duke pasur parasysh se Zvicra është ndër tre investitorët më të mëdhenj të huaj në Mal të Zi në pesë vitet e mëparshme”, thuhet në një deklaratë nga zyra e Millatoviqit.
Presidenti Millatoviq theksoi se anëtarësimi i plotë në BE është synim prioritar i politikës së jashtme të vendit tonë dhe se Mali i Zi është i vendosur të vazhdojë me reformat në mënyrë që të përmbushë sa më shpejt obligimet nga procesi i negociatave.
Ministri zviceran shprehu kënaqësinë për takimin dhe vlerësoi progresin evident demokratik të vendit tonë në periudhën e kaluar, si dhe vlerësoi se Mali i Zi përfaqëson një faktor të rëndësishëm në stabilitetin e rajonit të Ballkanit Perëndimor.
Gjatë takimit u shpreh interesi i ndërsjellë për përmirësimin e mëtejshëm të bashkëpunimit në fushën e arsimit, shkencës dhe turizmit.
Në fund, ministri zviceran i ka përcjellë presidentit Millatoviq ftesën e presidentit zviceran për të marrë pjesë në Samitin e Paqes për Ukrainën, i cili do të mbahet në nivel të lartë muajin e ardhshëm në Burgenstock.
Qëllimi kryesor i samitit të ardhshëm, në të cilin do të marrin pjesë liderë të shumtë botërorë, është të sigurojë një platformë për dialog dhe vendosjen e një paqeje gjithëpërfshirëse dhe të qëndrueshme në Ukrainë.