Gjermania është kualifikuar në gjysmëfinale të Eurobasketit. Të martën mbrëma në Berlin, gjermanët kanë shfaqur ndeshje të madhe ndaj Greqisë për të zënë vend në mesin e katër përfaqësueseve më të mira evropiane të basketbollit. Greqia ishte favorite, por gjermanët bënë shkëputjen e madhe në çerekun e tretë, të cilin e fituan 26:10. Në çerekun e katërt grekët mbetën pa superyllin Giannis Antetokounmpo, që u përjashtua, dhe kështu Gjermania vetëm e konfirmoi fitoren. Rezultati në fund ishte 107:96 në të mirë të Gjermanisë.

Plejmejkeri Dennis Schroder udhëhoqi Gjermaninë me 26 pikë e tetë asistime. Daniel Theis shtoi 13 pikë e plot 16 kërcime, ndërsa Andreas Bost i kishte 19 pikë e katër kërcime. 19 pikë i shënoi edhe Franz Wagner.

Greqisë nuk i kryen punë 31 pikët e Giannis Antetokounmpos. Ai kishte edhe tetë asistim e shtatë kërcime, ndërsa i humbi pesë topa. Giannoulis Larentzakis realizoi 18 pikë e katër kërcime. Por mungoi kontributi i të tjerëve. Gjermania në gjysmëfinale takohet me Spanjën, më 16 shtator.