Kryetari i Kuvendit të Malit të Zi, Andrija Mandiq, u takua sot në Beograd me kryeministrin e Republikës së Serbisë, Milosh Vuçeviq, njoftoi Kuvendi i Malit të Zi. Sipas njoftimit, Mandiq vlerësoi se ky takim vëllazëror është jashtëzakonisht i rëndësishëm për forcimin e marrëdhënieve ndërmjet dy vendeve më të afërta në rajon – Serbisë dhe Malit të Zi, dhe se një të ardhme më të mirë të përbashkët duhet ta ndërtojmë mbi themele të një ekonomie të shëndoshë dhe të një lidhjeje më të mirë infrastrukturore.

Në këtë kontekst, presidentët diskutuan për projektet kryesore infrastrukturore të autostradës, rikonstruktimin e binarëve Beograd-Tivar dhe valorizimin e Portit të Tivarit.

Siç thuhet në njoftim, Mandiq theksoi se Mali i Zi ka siguruar mjete për seksionin e autostradës deri në Andrijevicë, si dhe për rekonstruktimin e një pjese të binarëve që ndodhen në territorin e Malit të Zi.

“Presidentët ranë dakord që ndërtimin e seksionit që do të lidhë Andrijevicën dhe Duga Poljanën duhet ta paraqesin si një projekt të përbashkët të Malit të Zi dhe Serbisë në një tender ndërkombëtar. Kryeministri Vuçeviq shprehu kënaqësinë që kishte mundësinë të mirëpresë presidentin Mandiq dhe delegacionin e tij, duke shtuar se ky është një takim me rëndësi të dyanshme,” theksuan nga Kuvendi.

“Vuçeviq përfundoi duke thënë se Serbia nuk ka ndonjë vend fqinj më të afërt se Mali i Zi, dhe se me këtë takim po hapet një faqe e re e marrëdhënieve, si dhe se Serbia dëshiron të forcojë bashkëpunimin bilateral, duke e konsideruar të rëndësishme emërimin e ambasadorit të Malit të Zi në Serbi,” përfunduan nga Kuvendi i Malit të Zi.