Rregullatori i barnave i Bashkimit Evropian miratoi të hënën përdorimin e vaksinës kundër Covid-19 nga Novavax me bazë në SHBA tek njerëzit 18 vjeç e lart, duke hapur rrugën për një vaksinë të pestë të coronavirusit në rajon.

Sipas mediave të huaja, përcjell Telegrafi, të dhënat nga dy studime të mëdha treguan se vaksina ka një efikasitet prej rreth 90%, tha Agjencia Evropiane e Barnave (EMA), duke shtuar se aktualisht kishte të dhëna të kufizuara mbi efikasitetin e saj kundër disa varianteve shqetësuese, duke përfshirë Omicron.

“Pas një vlerësimi të plotë, komiteti i barnave humane i EMA-s (CHMP) përfundoi me konsensus se të dhënat mbi vaksinën ishin të forta dhe plotësonin kriteret e BE-së për efikasitetin, sigurinë dhe cilësinë”, tha rregullatori.

Infeksionet me Covid-19 kanë thyer rekorde në disa pjesë të Evropës javët e fundit, me qeveritë dhe studiuesit që përpiqen të forcojnë mbrojtjen kundër variantit të coronavirusit Omicron që përhapet me shpejtësi, duke nxitur kufizime të rinovuara përpara festave.

Miratimi për vaksinën me dy doza, të quajtur Nuvaxovid, vjen shumë përpara autorizimit të mundshëm në Shtetet e Bashkuara, ku Novavax-it i është dashur të zgjidhë çështjet e prodhimit dhe pret të dorëzojë kërkesën për miratim deri në fund të vitit. /Telegrafi/