Presidentja e Kosovës, Vjosa Osmani, së bashku me Ministrin e Mbrojtjes, Ejup Maqedonci, morën pjesë në Ekspozitën dhe Konferencën Globale për Sigurinë Kombëtare dhe Sigurinë Publike, Milipol Qatar, një nga ngjarjet më të rëndësishme në fushën e sigurisë.

Osmani theksoi se “kjo ngjarje shquhet për prezantimin e produkteve dhe shërbimeve më të reja inovative në fushën e mbrojtjes dhe sigurisë publike, të cilat prodhohen edhe konform standardeve të NATO-s.”

Ajo e përshkroi Milipol Qatar si një mundësi të shkëlqyer për të shkëmbyer përvojat dhe për të ndarë teknologjitë më të avancuara në mbrojtje.

Osmani dhe Maqedonci patën mundësinë të takohen me përfaqësues të tjerë të lartë nga vende të ndryshme, duke theksuar rëndësinë e aleancave strategjike përballë sfidave të reja të sigurisë.