Gjatë fundjavës së datave 3 dhe 4 maj 2025, në ambientet sportive të klubit të tenisit “Bellevue” në Ulqin u mbajt turneu ndërkombëtar “Cungu Open”. Ky aktivitet shënoi një hap të rëndësishëm në kalendarin sportiv të këtij qyteti bregdetar, duke mbledhur pjesëmarrës nga rajoni dhe më gjerë, të cilët konkuruan në një atmosferë sportive dhe miqësore. Turneu “Cungu Open” u karakterizua nga ndeshje dinamike dhe një organizim profesional, duke konfirmuar edhe një herë potencialin e Ulqinit për të pritur ngjarje sportive me përmasa ndërkombëtare. Turneu gjithashtu shërbeu si një përgatitje për serinë e garave që do të zhvillohen gjatë sezonit të verës. Drejtori i klubit të tenisit “Bellevue”, Senad Tafa, theksoi rëndësinë e organizimit të këtyre turneve para-sezonale, të cilat shërbejnë si ngrohje për sportistët dhe si promovim për turizmin sportiv në qytet. “Objektivi ynë është që ta promovojmë tenisin si sport, ta përfshijmë më shumë rininë dhe ta vendosim Ulqinin në hartën e destinacioneve elitare për sportet me raketë”, shtoi ai. Klubi i tenisit Bellevue në Ulqin ka ndërtuar me përkushtim një reputacion pozitiv ndër vite, duke qenë organizator i rregullt i garave të cilësisë së lartë dhe një kontribuues i rëndësishëm në zhvillimin e sportit në këtë pjesë të Malit të Zi. Me mbështetjen e sponsorëve lokalë dhe bashkëpunëtorëve ndërkombëtarë, klubi është i vendosur që të vazhdojë në rrugën e suksesit, duke krijuar hapësira të reja për zhvillimin e talentëve të rinj dhe për rritjen e profilit sportiv të Ulqinit në skenën ndërkombëtare.