Presidenti i Malit të Zi, Jakov Millatoviq, iu drejtua Gjykatës Kushtetuese duke kërkuar që ajo të shprehet për kushtetutshmërinë dhe ligjshmërinë e vazhdimit të ushtrimit të funksionit të gjyqtares Desanka Lopiçiq, pasi ajo më 23 janar 2026 plotëson kushtet për realizimin e së drejtës për pension pleqërie. “Siç jeni në dijeni, duke vepruar sipas njoftimit të Gjykatës Kushtetuese të Malit të Zi, akti nr. 555/25 i datës 26 qershor 2025, kam shpallur dhe kam zhvilluar procedurën e propozimit në Kuvendin e Malit të Zi të kandidatit për gjyqtar të Gjykatës Kushtetuese, i cili do të zëvendësonte gjyqtaren e deritanishme Desanka Llopiçiq. Ky akt ndodhet në procedurë parlamentare dhe do të zhvillohet votimi i dytë për kandidatin që kam propozuar”, ka theksuar Millatoviq në shkresën e tij. Ai thekson se, ndërkohë, gjyqtares Lopiçiq i ka përfunduar mandati kushtetues dymbëdhjetëvjeçar për të cilin ishte zgjedhur dhe se Kuvendi i Malit të Zi, më 28 dhjetor 2025, ka konstatuar përfundimin e funksionit të saj. “Në të njëjtën ditë, duke zbatuar dispozitën e nenit 15 të Ligjit për Gjykatën Kushtetuese, kushtetutshmëria e të cilit, së paku, është e diskutueshme, Kuvendi i Malit të Zi ka konstatuar se zonja Lopiçiq vazhdon të ushtrojë funksionin e gjyqtares së Gjykatës Kushtetuese deri në zgjedhjen e një gjyqtari të ri, por jo më gjatë se një vit”, thuhet në shkresën që Millatoviq i ka drejtuar kryetares së Gjykatës Kushtetuese, Snezhana Armenko. “Megjithatë, në bazë të shqyrtimit të aktit tuaj nr. 962/24-1 të datës 11 dhjetor 2024, të cilin ia keni dërguar Komisionit Kushtetues të Kuvendit të Malit të Zi, mund të konstatohet se zonja Lopiçiq më 23 janar 2026 mbush 65 vjeç dhe ka mbi 40 vjet stazh sigurimi, me ç’rast plotëson kushtet për realizimin e së drejtës për pension pleqërie. Kujtoj se, në bazë të të njëjtit akt dhe duke u thirrur në arsye identike, Komisioni Kushtetues i Kuvendit të Malit të Zi në dhjetor 2024 ka konstatuar se ish-gjyqtarja e Gjykatës Kushtetuese, Dragana Gjuranoviq, ka plotësuar kushtet për pension pleqërie, pas së cilës kryetari i Kuvendit të Malit të Zi ka konstatuar përfundimin e funksionit të saj”, thuhet në shkresë. Më tej, ai thekson se, duke pasur parasysh detyrimin kushtetues të Gjykatës Kushtetuese për të njoftuar Kuvendin e Malit të Zi për faktet që lidhen me shfaqjen e arsyeve për përfundimin e funksionit ose shkarkimin e gjyqtarëve të këtij institucioni, si dhe në kontekstin e qëndrimit të Kuvendit të Malit të Zi të mbajtur me rastin e pensionimit të gjyqtares Gjuranović, vlerëson se është e arsyeshme të shqyrtohet: – nëse më 23 janar 2026 paraqiten rrethana që mund të ndikojnë në zbatimin e mëtejshëm të vendimit të Kuvendit të Malit të Zi të datës 28 dhjetor 2025, me të cilin iu mundësua gjyqtares Lopiçiq që, pavarësisht përfundimit të mandatit kushtetues dhe konstatimit të përfundimit të funksionit nga ana e Kuvendit, të vazhdojë ushtrimin e funksionit të gjyqtares së Gjykatës Kushtetuese; – nëse krijohen kushtet që për faktet e konstatuara të njoftohet Kuvendi i Malit të Zi, në mënyrë që ky organ shtetëror të rishqyrtojë qëndrueshmërinë juridike të mëtejshme të vendimit të 28 dhjetorit 2025, përkatësisht të rishqyrtojë nëse zonja Lopiçiq mund të kryejë detyrat e gjyqtares së Gjykatës Kushtetuese edhe pas plotësimit të kushteve për pension pleqërie. Ai vë në dukje edhe faktin shtesë se ish-gjyqtarja Gjuranoviq, në momentin e pensionimit, ishte gjyqtare në mandat të plotë kushtetues, ndryshe nga situata aktuale me Lopiçiq, së cilës për shkak të përfundimit të mandatit i është konstatuar tashmë përfundimi i funksionit gjyqësor nga ana e Kuvendit të Malit të Zi. Millatoviq vlerëson se është shumë e rëndësishme që, përmes mekanizmave të bashkëpunimit institucional, të forcohet parimi i sundimit të ligjit në Mal të Zi, të përmirësohet siguria juridike dhe të sigurohet konsistencë në veprimtarinë e organeve shtetërore. “Prandaj është e domosdoshme që çdo praktikë negative që cenon realizimin e këtyre qëllimeve ta identifikojmë qartë dhe, brenda kompetencave të përcaktuara kushtetuese dhe ligjore, ta eliminojmë në mënyrë efikase nga rendi juridik dhe institucional”, thuhet në shkresën që Millatoviq i ka dërguar Gjykatës Kushtetuese.