Prokurori i Përgjithshëm i Shqipërisë, Olsian Çela, ka raportuar në Komisionin e përbashkët për Nismat Qytetare dhe Çështjet Ligjore mbi rritjen e kriminalitetit gjatë vitit 2024. Sipas Çelës, gjatë vitit të kaluar janë trajtuar mbi 61 mijë materiale për ndjekje penale, çka përbën një rritje me më shumë se 10% në krahasim me vitin 2023. Koeficienti i kriminalitetit për 100.000 banorë ka arritur në 1037, nga 872 që ishte një vit më parë, duke reflektuar një tendencë në rritje të veprave penale në vend. Sipas të dhënave të raportuara, qarku me nivelin më të ulët të kriminalitetit është ai i Beratit, ndërsa më i larti regjistrohet në qarkun e Sarandës. Çela theksoi se shtimi i procedimeve lidhet jo vetëm me rritjen e krimeve tradicionale, por sidomos me veprat në fushën ekonomike dhe financiare. Procedimet për veprat penale kundër pastrimit të parave janë rritur me gati 59%, ato për falsifikim monedhash e letrash me vlerë me 48%, ndërsa krimet në dogana kanë shënuar një rritje prej afro 40%. Po ashtu, veprat që lidhen me aktivitetet bankare dhe financiare janë rritur me mbi 33%. Prokurori i Përgjithshëm nënvizoi se këto tregues dëshmojnë për nevojën e forcimit të bashkëpunimit ndërinstitucional dhe të reformimit të mëtejshëm të sistemit të drejtësisë penale. Ai kërkoi rritje të kapaciteteve hetimore dhe përdorim më efektiv të teknologjisë në hetimin e krimeve financiare dhe kibernetike, të cilat po shfaqen me një dinamikë të re. Çela gjithashtu vuri në dukje rëndësinë e parandalimit të korrupsionit dhe forcimit të transparencës në institucionet publike si faktorë kyç për uljen e kriminalitetit në vend. Raporti i tij pritet të shërbejë si bazë për rekomandime ligjore dhe veprime konkrete në drejtim të rritjes së sigurisë dhe besimit publik në drejtësi.