Korrespondenca që është bërë publike midis ish-pjesëtarit të shërbimeve të sigurisë Drago Spiqanoviq dhe biznesmenit të dyshuar për krijimin e një organizate kriminale, Aleksandar Mijajloviq, përbën një dëshmi të pakundërshtueshme se strukturat e dikurshme kriminale, të sigurisë dhe ato parapolitike kanë përhapur urrejtje kombëtare dhe fetare – ka deklaruar sekretari i përgjithshëm i PES-it, Boris Pejoviq. “Pas informimit të opinionit publik me detajet e veprimit të ish-agjentit të ANB-së, Petar Lazoviq, në Pljevlja pas 30 gushtit 2020, falë korrespondencës në aplikacionin Sky, këto ditë po dëshmojmë se strukturat e sigurisë të regjimit hibrid të përmbysur kanë nxitur urrejtje kombëtare dhe fetare në shumë qytete të Malit të Zi, ku jetojnë kryesisht komunitete më pak të përfaqësuara, përfshirë edhe Rozhajen”, tha Pejoviq. Ai shtoi se mbishkrimet me të cilat frikësohet popullsia më pak e përfaqësuar e besimit islam, me qëllim që kjo vepër e rrezikshme t’i atribuohet një komuniteti tjetër fetar dhe kombëtar, tregojnë se strukturat e dikurshme të pushtetit, për shkak të humbjes së tij, kanë tentuar të shkaktojnë një konflikt ndërfetar dhe ndëretnik me pasoja të paparashikueshme. “Ka ardhur koha që vendi ynë të çlirohet nga barra e errët e së kaluarës, në mënyrë që Malin e Zi qytetar, me të gjitha dallimet e tij, por njëkohësisht me përparësitë e tij, ta integrojmë në një shoqëri moderne, nën ombrellën e Bashkimit Evropian, me fokus në përmirësimin e mëtejshëm të standardit të jetesës dhe sundimit të ligjit”, përfundoi Pejoviq.