Në Mal të Zi, gratë lindin mesatarisht rreth 1,76 fëmijë gjatë jetës së tyre (në vitin 2023), që është pak më shumë se mesatarja e Bashkimit Evropian, e cila është 1,38. Të dhënat e Eurostat-it tregojnë se norma e fertilitetit në Mal të Zi është stabilizuar gjatë dhjetë viteve të fundit: ajo ishte 1,73 në vitin 2013, u rrit në 1,76 në 2021, arriti 1,78 në 2022, dhe më pas ra pak në 1,76 në 2023. Një normë totale e fertilitetit nën 2,1 do të thotë se, pa migrim, numri i popullsisë nuk do të mund të mbetej i qëndrueshëm në mënyrë natyrale. Megjithatë, krahasuar me shumë vende të BE-së, Mali i Zi ende shënon një nivel relativisht më të lartë të lindshmërisë, që tregon se familjet malazeze ende vendosin më shpesh të kenë më shumë fëmijë se mesatarja e shteteve evropiane. Në vitin 2023, norma totale e fertilitetit në BE ishte 1,38 lindje të gjalla për grua. Gjatë dekadave të fundit, gratë evropiane në përgjithësi po lindin më pak fëmijë, dhe ky trend shpjegon pjesërisht ngadalësimin e rritjes së popullsisë në BE, sipas të dhënave të Eurostat-it. Treguesi më i përdorur i fertilitetit është norma totale e fertilitetit (TFR): ajo përfaqëson numrin mesatar të fëmijëve që do të lindte një grua gjatë periudhës së saj riprodhuese, nën supozimin se ajo kalon nëpër vitet e lindjes sipas normave të moshës për një vit të caktuar. “Një normë totale fertiliteti rreth 2,1 lindje të gjalla për grua konsiderohet si norma e zëvendësimit të brezave në vendet e zhvilluara. Me fjalë të tjera, ky është numri mesatar i fëmijëve për grua që nevojitet që popullsia të mbetet e qëndrueshme pa migrim. TFR nën 1,3 shpesh quhet ‘fertilitet shumë i ulët’. Norma totale e fertilitetit është e krahasueshme midis vendeve sepse merr parasysh ndryshimet në madhësinë dhe strukturën e popullsisë”, thuhet në faqen e Eurostat-it. Sipas Eurostat-it, në vitin 2023 në BE kanë lindur 3,67 milionë foshnja. “Norma totale e fertilitetit ishte 1,38 lindje të gjalla për grua në BE në vitin 2023, duke u lëvizur nga 1,06 në Maltë deri në 1,81 në Bullgari. Mosha mesatare e grave në lindjen e fëmijës së parë në BE në 2023 ishte 29,8 vjeç, nga 26,9 në Bullgari deri në 31,8 në Itali,” sipas të dhënave të Eurostat-i.