Autor: tvteuta

Kryeministri i Kosovës, Albin Kurti në mbledhjen e sotme të Qeverisë ka treguar arsyet e vizitës së tij në komunën e Leposaviqit.

Kurti tha se kjo vizitë kishte të bënte në kuadër të muajit rozë, për ndërgjegjësimin e kancerit të gjirit.

“Sapo erdha nga Leposaviqi ku ishim bashkë me ministrin e Shëndetësisë, Arben Vitia dhe drejtorin e Klinikës së Gjinekologjisë, Zef Ndrejaj. Meqenëse në Leposaviq do të qëndroj mamografi për dy ditë për tu mundësuar kontrolle grave dhe vajzave në mënyrë që të bëhet sa më shumë ndërgjegjësimi për kancerin e gjirit për parandalimin dhe diagnostifikimin e tij. Pas Leposaviqit mamografi do të vazhdoj në Viti”, tha Kurti.

Ai shtoi se me ministrin Vitia kanë shqyrtuar edhe mundësinë e kthimit në maternitet të një objekti.

“Pamë nga afër një objekt një ndërtesë për ta vlerësuar mundësinë e kthimit të saj në maternitet që i plotëson nevojat e grave nga Leposaviqi në mënyrë që të mos kenë nevojë ta kalojnë kufirin dhe të udhëtojnë me dhjetëra kilometra e madje edhe mbi 50 kilometra deri në Novi Pazar, ku pastaj edhe foshnjat po ua regjistrojnë si qytetarë të Serbisë”, tha Kurti.

Tre të akuzuar për rastin e sulmit në Banjskë, Bllagoje Spasojeviq, Vlladimir Tolliq dhe Dushan Maksimoviq, u deklaruan të pafajshëm para organeve të drejtësisë në Kosovë.

Në Gjykatën Themelore në Prishtinë u mbajt të mërkurën seanca përgatitore për rastin e këtij sulmi, në të cilën të akuzuarit që ndodhen në paraburgim në Kosovë, u deklaruan lidhur me fajësinë.

Seanca nisi me leximin e emrave të të akuzuarve që ndodheshinn në sallën e gjyqit, ndërkohë që prokurori lexoi aktakuzën.

Prokuroria Speciale e Kosovës ngriti më 11 shtator një aktakuzë kundër 45 personave, të cilët akuzohen për terrorizëm, financim të terrorizmit dhe vepra të tjera të rënda penale, por vetëm tre prej tyre – Tolliq, Spasojeviq dhe Maksimoviq – janë në dispozicion të organeve të drejtësisë.

Ata u arrestuan pas sulmit të armatosur në Banjskë, në veri të Kosovës, më 23 shtator të vitit të kaluar, kur një grup i armatosur serbësh sulmoi Policinë e Kosovës dhe vrau policin Afrim Bunjaku.

Gjatë shkëmbimit të zjarrit më pas u vranë edhe tre sulmues serbë.

Përgjegjësinë për sulmin e mori Millan Radoiçiq, ish-nënkryetar i Listës Serbe, partisë më të madhe të serbëve në Kosovë, që ka mbështetjen e Beogradit zyrtar.

Besohet se ai, dhe shumica e pjesëtarëve të këtij grupi të armatosur, ndodhen në Serbi.

Seanca përgatitore ishte paraparë të mbahej më 25 shtator, por avokatët e të arrestuarve kërkuan shtyrje me arsyetimin se kishin marrë aktakuzën me vonesë dhe se u nevojitej kohë për t’u përgatitur.

Prokuroria, në anën tjetër, kërkoi që gjykimi të fillojë edhe për të akuzuarit që janë në arrati, gjë që u kundërshtua nga avokatët, duke theksuar se një gjë e tillë nuk e parashihet me ligjet e Kosovës.

Në fund, gjyqtari i rastit, Arben Hoti tha se do të kërkojë një opinion juridik nga Gjykata Supreme për interpretimin e Ligjit kur bëhet fjalë për gjykim në mungesë, dhe konstatoi se ka kushte për të gjykuar ata që ndodhen në paraburgim në Kosovë.

Gjykata Supreme ka konfirmuar për Radion Evropa e Lirë se e ka pranuar kërkesën për këtë çështje, më 30 shtator, dhe se lënda po shqyrtohet.

Zyrtarë të saj theksuan se nuk ka një afat brenda të cilit Gjykata Supreme e Kosovës duhet të japë mendimin e saj juridik.

Prokuroria Speciale e Kosovës i ngarkon të akuzuarit në rastin Banjska, ndër të tjera, për vepra terroriste dhe vepra kundër rendit kushtetues dhe sigurisë së Kosovës.

Më herët, prokurori i rastit Naim Abazi ka thënë se të akuzuarit kishin role të ndryshme brenda grupit kriminal – nga organizimi dhe drejtimi i aktiviteteve terroriste deri te financimi dhe pastrimi i parave.

Në aktakuzë thuhet se ky grup, përmes përdorimit të dhunës me armatim të rëndë, ka tentuar “ta shkëpusë pjesën veriore të territorit të Republikës së Kosovës, respektivisht komunat e banuara me shumicë serbe, dhe këtë pjesë të territorit t’ia bashkojë Republikës së Serbisë”.

Si lider i këtij grupi është identifikuar Millan Radoiçiq, për të cilin thuhet se ka luajtur një rol të rëndësishëm në koordinimin dhe aktivitetet kriminale. Radoiçiq gjendet në listën e zezë të Shteteve të Bashkuara dhe Mbretërisë së Bashkuar për lidhjet me krimin e organizuar ndërkombëtar dhe korrupsionin. Në Kosovë, Radoiçiq gjithashtu lidhet me vrasjen e një politikani opozitar serb dhe frikësimin e dëshmitarëve në një proces gjyqësor që lidhet me ndërtimet ilegale.

Në aktakuzë, Prokuroria përmend 34 dosje me prova, në mesin e të cilave ka video-incizime, analiza të pajisjeve elektronike, përgjigje të ndryshme nga Luksemburgu, Bosnje e Hercegovina, bankat dhe institucione të ndryshme, deklarata të dëshmitarëve etj.

Hetimin e sulmit në Banjskë po e udhëheq edhe Prokuroria e Lartë Publike në Beograd, e cila ngarkon Radoiçiqin me tre vepra penale – ndër të cilat janë prodhimi i paautorizuar, posedimi, mbajtja dhe trafikimi i armëve të zjarrit dhe lëndëve shpërthyese, dhe vepra të rënda kundër sigurisë publike. Të dyshuarit e tjerë janë persona të panjohur (NN).

Autoritetet e Kosovës e konsiderojnë sulmin në Banjskë një akt terrorist dhe akuzojnë Serbinë se qëndron pas tij. Ministri Sveçla tha se ekzistojnë informacione të inteligjencës se të njëjtat grupe vazhdojnë të stërviten në territorin e Serbisë dhe rreth kufirit mes Kosovës dhe Serbisë.

Nga ana tjetër, Serbia në disa raste ka mohuar çdo përfshirje, ndërsa presidenti i Serbisë, Aleksandar Vuçiq, ka theksuar se për Beogradin ky sulm nuk është terrorist, por po hetohet.

Bashkësia ndërkombëtare e ka dënuar ashpër sulmin në Banjskë dhe ka kërkuar hetim dhe që përgjegjësit të dalin para drejtësisë.

Presidenti rus, Vladimir Putin, planifikon të takohet me homologun e tij iranian, Masud Pezeshkian këtë javë, teksa rriten shqetësimet se kriza në Lindje të Mesme mund të dalë jashtë kontrollit.

Agjencitë ruse të lajmeve kanë cituar këshilltarin e presidentit Putin, Yury Ushakov, të ketë thënë se dy liderët do të takohen në kryeqytetin turkmen, Ashgabat, më 11 tetor.

Ushakov ka thënë se Putin planifikon të diskutojë me Pezeshkianin edhe në samitin BRICS që do të mbahet në qytetin rus, Kazan, më 22-24 tetor.

Në këto njoftime është sinjalizuar vazhdimi i bashkëpunimit në mes të të dyja vendeve, teksa krizës në Lindje të Mesme nuk i shihet fundi.

Ushakov nuk ka dhënë më shumë hollësi për takimet, por vetëm që Putin nuk ka plan të takohet me kryeministrin izraelit, Benjamin Netanyahu, sa i përket përshkallëzimit të situatës në rajon.

Mosplanifikimi i një takimi me Netanyahun sugjeron se fokusi aktual diplomatik i Rusisë mund të jetë më i lidhur me partneritetet në kuadër të kornizës së BRICS-it, që përbëhet nga Brazili, Rusia, India, Kina, Afrika e Jugut.

Izraeli e ka shënuar të hënën përvjetorin e parë të sulmeve të Hamasit në tokën izraelite, si pasojë e të cilave janë vrarë më shumë se 1.200 njerëz dhe janë marrë peng rreth 250 të tjerë.

Ushtria izraelite ka nisur më pas fushatë ushtarake në Gazë, me qëllim të shkatërrimit të Hamasit.

Aktualisht, ushtria izraelite është duke kryer sulme ajrore edhe në Bejrut, me qëllim të shkatërrimit të grupit tjetër militant, Hezbollah.

Hamasi është grup i shpallur terrorist prej Shteteve të Bashkuara dhe Bashkimit Evropian.

Hezbollahu është i shpallur grup terrorist prej Shteteve të Bashkuara, derisa BE-ja e ka në listë të zezë vetëm krahun e armatosur, por jo partinë politike.

Partia politike e Hezbollahut ka ulëse në Parlamentin e Libanit.

Si Hamasi, ashtu edhe Hezbollahu gëzojnë mbështetjn e Iranit.

 

Ministria e Mbrojtjes e Rusisë tha se ushtria e saj e ka zmbrapsur një sulm ukrainas me dronë mëngjesin e së martës në rajonin e saj kufitar Belgorod.

Ajo tha se kundërajrorët e saj i rrëzuan 16 mjete ajrore pa pilot (dronë).

Katërmbëdhjetë dronë u rrëzuan mbi rajonin e Belgorodit, i cili ndodhet në kufi me Ukrainën, ndërsa dy të tjerët u shkatërruan pranë bregdetit rus në Detin e Zi, tha Ministria ruse në Telegram.

Një ditë më herët, dronët ukrainas e goditën një depo nafte në Feodosia, e cila është më e madhja në Gadishullin e okupuar të Krimesë, duke shkaktuar zjarr dhe duke detyruar qindra banorë të evakuohen.

 

Krimea u aneksua nga Rusia më 2014, ndërsa Kievi do që ta rimarrë atë, teksa po lufton kundër pushtimit të plotë rus prej 17 muajsh.

Lufta në Ukrainë ka nisur më 24 shkurt 2022. Presidenti rus, Vladimir Putin, e quan luftën si “operacion special ushtarak” për të çmilitarizuar Ukrainën.

Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.

Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre.

Turqia njoftoi të martën se do t’i evakuojë shtetasit turq nga Libani përmes transportit detar të mërkurën.
Ministria e Jashtme e Turqisë tha se anijet e marinës turke do t’i bartin turqit të cilët kanë kërkuar të largohen nga Libani.
Dy anije, me hapësirë të përgjithshme për rreth 2.000 udhëtarë, pritet të nisen sot drejt Bejrutit.
Ministria turke tha se procesi i evakuimit do të vazhdojë edhe në ditët në vazhdim, nëse është e nevojshme, duke shtuar se anijet që kryejnë evakuimin do të bartin edhe ndihma humanitare për Libanin.
Zyrtarët turq kanë thënë se kanë përpiluar planet për evakuimin e qytetarëve të vet nga Libani, për shkak të përkeqësimit të gjendjes së sigurisë atje.
Turqia vlerësohet se i ka 14.000 shtetas të regjistruar në konsullatën e vet në Liban. Ndërkohë, sipas Reuters, rreth 2.500 turq kanë aplikuar për t’u larguar nga Libani.

Turqia ka thënë më herët se po punonte me rreth 20 vende për t’u përgatitur për evakuimin e shtetasve të huaj përmes Turqisë.

Qindra njerëz të kombësive të ndryshme mbërritën në Turqi nga Libani javën e kaluar përmes anijeve komerciale.

Javët e fundit, ushtria izraelite i ka bombarduar shënjestrat e Hezbollahut në jug të Libanit dhe përreth Bejrutit, ndërkohë që është duke e kryer edhe një inkursion tokësor njëkohësisht.