Konferenca ndërqeveritare që do të mbahet nesër me Malin e Zi është një shenjë se vendi ka bërë përparim të dukshëm gjatë viteve të fundit në përmbushjen e kërkesave të BE-së dhe është një sinjal i mirë për të gjithë rajonin. Këtë ia ka bërë të ditur korrespondentit nga Brukseli një diplomat i lartë i BE-së, i cili ka kërkuar anonimitetin, shkruan RTMZ.
Diplomati i BE-së thekson se shpejtësia e progresit në negociata do të diktojë ritmin e reformave në Mal të Zi.
“Shpejtësia e progresit është në duart e Malit të Zi. Standardet kalimtare në kapitujt 23 dhe 24 janë përmbushur, kemi një marrëveshje për standardet për mbyllje, të cilat do t’i prezantohen Qeverisë së Malit të Zi”, tha diplomati evropian.
Ai theksoi se tani është një punë e vështirë për të mbyllur kapitujt e tjerë.
“Topi është në Podgoricë, për ta punuar me përkushtim. Nëse mund ta bëni për një muaj, aq më mirë, atëherë do t’i mbyllim kapitujt në shtator, nëse duhet më shumë kohë për t’u mbyllur, atëherë do të presim.” tha diplomati i BE-së.
Zyrtari i lartë përkujtoi se kjo është Konferenca e dytë Ndërqeveritare me Malin e Zi gjatë presidencës belge të Këshillit të BE-së, që është një impuls i fortë politik dhe një shenjë se ka progres.
Konferenca ndërqeveritare me Malin e Zi do të mbahet të mërkurën, më 26 qershor, në orën 14:30 dhe përveç kryeministrit Millojko Spajiq, përfaqësuesi i lartë i BE-së për politikë të jashtme Jozep Borel, Komisioneri për Zgjerim Oliver Varheli dhe Ministri i Punëve të Jashtme të Belgjikës Hadja Labib, si dhe përfaqësues të vendeve të tjera anëtare të BE-së.
Presidenca belge do të konfirmojë përmbushjen e standardeve të përkohshme dhe do të shpallë standardet përfundimtare të dakorduara nga BE. Komisioneri Varheli do të japë komente shtesë.
Pala malazeze më pas pritet të pajtohet me kriteret e propozuara për mbylljen e kapitullit.
Pas këtij eventi do të mbahet një konferencë për media e cila është planifikuar për në orën 16:00.

Konferenca e parë ndërqeveritare me Malin e Zi në nivel ministror u mbajt më 29 qershor 2012, kur vendi ynë nisi zyrtarisht negociatat. Mali i Zi ka hapur të 33 kapitujt e negociatave në të cilat negocion me BE-në, ndërsa tre janë mbyllur përkohësisht.
Në maj 2021, Këshilli ra dakord të zbatojë metodologjinë e rishikuar të zgjerimit në negociatat e anëtarësimit me Malin e Zi me synimin për të rigjallëruar procesin e pranimit, duke vënë një fokus më të fortë në reformat themelore dhe udhëzime më të forta politike. Me metodologjinë e re, kapitujt janë grupuar në gjashtë grupime.