Pri barskom Domu zdravlju aktivne su dvije kovid ambulante, za djecu i odrasle, a direktorica ove ustanove dr Branka Purlija kazala je da čekaju na isporuku brzih antigenskih testova, dok se pacijenti koji sumnjaju na Covid testiraju putem PCR metode.

 „U kovid ambulanti za odrasle se na dnevnom nivou uradi oko 70-80 pregleda, dok je taj broj u dječjoj kovid ambulanti mnogo manji. Uglavnom se radi o djeci uzrasta od petnaest godina. Što se tiče zdravstvenih radnika, ni oni nijesu imuni na koronavirus, te trenutno imamo tri zaposlena koji su pozitivni“, kazala je Purlija.

Pri barskom Domu zdravlja aktivne su područne  jedinice u Starom Baru, Sutomoru, Virpazaru ali i ona najudaljenija u Ostrosu. Purlija je pohvalila angažman ljekara iz područja Krajine, a podršku ljekarima pružaju i volonteri.

„U Ostrosu je vrlo stručan kadar. Nakon kontakta sa doktorkom Ganimetom Hodža, koja nas je obavijestila o prvim slučajevima kovida u tom kraju, epidemiolog, medicinska sestra i ja smo se uputili u Ostros, uručeno im je sto brzih testova, i već nakon prve posjete otvorena je kovid ambulanta. Kadar je pojačan sa tri volontera doktora medicine. Trenutno je u Ostrosu pozitivno dvadeset osoba, dok su dvije osobe preminule i ovim putem izražavam saučešće porodicama“, potvrdila je Purlija.  

Direktorica DZ Bar  zahvalila se građanima Bara na pridržavanju mjera te je izrazila nadu da bi u narednom periodu broj oboljelih u Baru mogao opasti. Na području Bara aktivna su 462 slučaja, dok su  preminula  34 pacijenta.