Jako nevrijeme koje je i dalje na snazi u Crnoj Gori ali  i u Ulcinju ostavilo je materijalnu štetu brojnim romskim porodicama u naseljima Kodre i Bijela gora. Jedna od njih je 63- godišnja Nepa Adžemović koja živi u trošnoj kolibi u Bijeloj gori, a posljednje nevrijeme joj je donijelo nove probleme. Narušenog zdravlja i još goreg materijalnog stanja Nepa moli ljude dobre volje i nadležne institucije da joj pomognu kako se njen trošni dom ne bi urušio.

Jednako kao i Nepa, jako nevrijeme ostavilo je petočlanu porodicu Zumre Adžemović iz naselja Kodre gotovo bez krova nad glavom. Voda je prodrla u sve prostorije trošne barake, u kojoj žive troje odraslih djece, djevojčica školskog uzrasta i novorođenče.