N.P Ujësjellës – kanalizime”: Prurjet e ujit në minimumin hidrologjik. Problemet do të vazhdojnë edhe në ditët në vijim
Prej tvteuta18:37, 10 Gusht 2022
Në lidhje me protestën e qytetarëve të Kalasë së Ulqinit për shkak të problemeve në furnizimin e rregullt me ujë, ndrëmarrja “Ujësjellës-kanalizime” ka dërguar një deklaratë për media në të cilën thuhet:
Punonjësit e autorizuar të shërbimit teknik ndodhen prej dy javësh në Qytetin e Vjetër, të gjitha me qëllim monitorimin e konsumit dhe zbulimin e prishjeve eventuale. Krahas këtyre aktiviteteve, shërbimet kompetente të mirëmbajtjes së ujëmatësve filluan pastrimin e valvulave dhe matësve të ujit të konsumatorëve në këtë lokalitet me qëllim largimin e papastërtive dhe bllokimeve të mundshme.
Gjithashtu ka filluar monitorimi i vazhdueshëm i konsumit të ujit në zona të caktuara në territorin e komunës së Ulqinit, me qëllim të reduktimit të konsumit joadekuat dhe rritjes së presionit. Ndërkohë, në kuadër të këtyre aktiviteteve, kjo ndërmarrje nga konsumatorët në zonën e poshtme të Kalasë ka kërkuar që ta përdorin ujin në mënyrë më racionale, me qëllim rritjen e prurjes së ujit për banorët e zonës së sipërme.
Ndërprerja e furnizimit me ujë të rregullt në këtë pjesë të qytetit, d.m.th. e Qytetit të Vjetër dhe vendbanimit Liman, ndodh edhe për shkak të ndërtimeve të objekteve të shumta banesore dhe komerciale në zonën e Fushës së Ulqinit, të cilat nuk u pasuan me ndërtimin e infrastrukturës së re. Krahas aktiviteteve që janë ndërmarrë ditëve të fundit në lidhje me përmirësimin e gjendjes sa i përket furnizimit me ujë, po ashtu informojmë opinionin se burimet në komunën e Ulqinit janë në minimumin e tyre hidrologjik. Duke marrë parasysh edhe temperaturat e larta dhe numrin e madh të vizitorëve, konsumi i ujit është në vlerat maksimale që mund të ofrojë kjo ndërmarrje dhe duke marrë parasysh këto rrethana, pritet që sa i përket furnizimit të rregullt me ujë, të ketë vështirësi edhe në ditët në vijim.
Në fund apelojmë tek të gjithë konsumatorët që ujin ta përdorin sa më racionalisht dhe të mos e përdorin për ujitje të kopshteve dhe hapësirave të tjera publike, sepse çdo sasi e derdhur rrit mundësinë e ndërprerjes së furnizimit të rregullt me ujë.”, thonë nga kjo ndërmarrje.