Pas sulmit në Ukrainë, Mali i Zi iu bashkua të gjitha masave kufizuese, duke përfshirë tetë paketa sanksionesh individuale dhe ekonomike që Bashkimi Evropian miratoi kundër Rusisë.

Sipas Ministrisë së Punëve të Jashtme, kjo do të thotë se të njëjtat masa do të zbatohen edhe në Mal të Zi në raport me Rusinë.

“Këto masa të synuara kanë ndikuar në interesat politike, ekonomike dhe personale të pjesëmarrësve aktivë në shkeljen e papranueshme të sovranitetit dhe integritetit territorial të Ukrainës. Me këto vendime, Mali i Zi vazhdon politikën e përputhshmërisë 100% me politikën e BE-së. Më e rëndësishmja, ne u tregojmë atyre solidaritetin tonë me Ukrainën, si dhe vendosmërinë tonë për të kontribuar në rivendosjen e paqes në Evropë me partnerë të tjerë dhe një gamë të gjerë vendesh në komunitetin ndërkombëtar. Përveç BE-së, sanksione dypalëshe kundër Rusisë kanë vendosur edhe shumë vende të tjera, si Shtetet e Bashkuara, Mbretëria e Bashkuar, Australia, Japonia, Zelanda e Re, por edhe Zvicra tradicionalisht neutrale”, thuhet në deklaratë.

U sqarua se masat individuale të BE-së, ndër të tjera, vlejnë për presidentin rus Vladimir Putin, ministrin e Jashtëm Sergei Lavrov, si dhe anëtarët e Këshillit të Sigurisë Kombëtare dhe anëtarë të tjerë të Dumës ruse, ndërsa sanksionet ekonomike përfshijnë financat, energjinë, transportin, sektori i teknologjisë dhe vizave.

Ministria e Punëve të Jashtme thekson se sa i përket sektorit të transportit, BE-ja ka vendosur sanksione në lidhje me mallrat dhe teknologjitë në industrinë e hapësirës ajrore.

Në deklaratë thuhet se janë miratuar masa kufizuese, të cilat përfshijnë ndalimin e importit të mallrave me origjinë nga rajonet Donetsk dhe Luhansk në BE, si dhe financim direkt dhe indirekt, sigurim dhe risigurim të mallrave nga këto zona, por edhe tregtimin e aksioneve apo letrave me vlerë.