Rikonstruimi i rrugës rajonale Tivar – Krythë do të mundësojë një lidhje më të shpejtë dhe më të sigurt me pikën kufitare të Sukubinës me Shqipërinë, si dhe një lidhje më të mirë ndërmjet vendbanimeve në brendësi të Tivarit dhe Ulqinit, tha kryeministri Millojko Spajiq.
Ai së bashku me ministren e Transportit Maja Vuķiçeviq, drejtorin e Administratës së Trafikut Radomir Vuksanoviq dhe kryetarët e komunës së Tivarit dhe Ulqinit, Dushan Raiçeviq dhe Genci Nimanbegu, zyrtarizuan fillimin e rindërtimit të 14 kilometrave rrugë.
“Ky është një nga projektet për të cilin flitet për më shumë se një dekadë, por nuk ka pasur vëmendje të mjaftueshme nga niveli qendror, përveshëm mëngët, filluam punën dhe ky është treguesi më i mirë për të gjithë “tomat e pabesë” se ka ardhur koha për të ndërtuar infrastrukturën në Mal të Zi dhe se historitë për pamundësinë e ndërtimit të rrugëve, autostradave, aeroporteve janë pas nesh”, tha kryeministri.
Ai theksoi se në pikën kufitare Sukubinë janë regjistruar gati tre milionë kalime.
“Nëse e kemi parasysh këtë, pa folur për interesat e komunitetit lokal, i cili ka nevojë për një mënyrë më të mirë dhe më efikase për t’u lidhur me Tivarin dhe Ulqinin dhe sigurisht me Podgoricën, është e qartë se po flasim për përfitimet e këtij projekti. Vendasit kanë pritur më shumë se një dekadë që kjo të ndodhë – rrugët janë jetë, pa to nuk do të ketë ekonomi, nuk ka jetë komode për qytetarët tanë, qytetarët nuk do të qëndrojnë në vatrat e tyre dhe ky është problemi i të gjitha problemeve. Dhe për këtë duhet të ketë një konsensus kombëtar rreth ndërtimit të rrugëve”, tha Spajiq.
Ministrja e Transportit, Maja Vukiçeviq, tha se sot më në fund me kënaqësi mund të themi se po fillon rindërtimi i kësaj rruge jashtëzakonisht të rëndësishme rajonale.
“Kjo rrugë do të lehtësojë ndjeshëm trafikun në shtrirjen Tivar-Ulqin dhe ne tregojmë se jemi të përkushtuar në ndërtimin e infrastrukturës, si në veri të vendit ashtu edhe në jug. Bashkëpunimi me komunën e Tivarit dhe komunën e Ulqinit është i madh”, tha ministrja.
Drejtori i Administratës së Trafikut Radomir Vuksanoviq ka sqaruar se bëhet fjalë për një pjesë prej 14 kilometrash.

“Vlera e punimeve është 12.2 milionë euro me TVSH. Kontraktor është Putevi Bar. Përfundimi i planifikuar i punimeve është tetor i vitit 2026. Pres që puna të përfundojë me kohë”, tha Vuksanoviq.
Kryetari i komunës së Tivarit, Dushan Raiçeviq, tha se kjo rrugë meriton epitetin e rrugës së miqësisë dhe bashkimit. Ai falënderoi të gjithë ata që kontribuan për fillimin e punimeve, veçanërisht popullatën vendase dhe komunitetin, të cilët, siç theksoi, shumë herë e kishin paralajmëruar se duhet të nisin punimet.
“Kjo rrugë patjetër do të thotë jetë, por edhe qëndrim dhe mbijetesë, si dhe kthim”. Hapat e parë konkretë u ndërmorën në vitin 2019, kur u bë rikategorizimi i rrugës lokale në rrugë rajonale. Komuna e Tivarit dhe Ulqinit morën përsipër të sigurojnë mjete për shpronësim, gjë që ne e bëmë. Rindërtimi i kësaj rruge do të mundësojë kushte më të mira jetese për popullatën vendase, diasporën që të kthehen në vendlindje, por edhe më pak sfida për turistët e shumtë”, tha Raiçeviq.
Ai beson se në fillim të sezonit të ardhshëm turistik të gjithë do të mund të përdorin një rrugë, e cila do të rikonstruktohet.
Kryetari i Komunës së Ulqinit, Genci Nimanbegu, tha se kjo është një ditë e shënuar për komunën e Ulqinit, Tivarit dhe Malin e Zi.
“Falënderoj të gjithë ata që kanë pasur ndikim që kjo të ndodhë dhe ky është një tregues i përkushtimit për çështje shumë të rëndësishme për jetën e qytetarëve”, tha Nimanbegu.