Agjencia për Parandalimin e Korrupsionit ka konstatuar se kryetarët e komunave Kollashin, Tivar dhe Tuz nuk kanë shkelur dispozitat e Ligjit për Parandalimin e Korrupsionit, të cilat i referohen kufizimeve në ushtrimin e funksioneve publike.

Sipas APK-së, Vlladimir Martinoviq, Dushan Raiçeviq dhe Nik Gjeloshaj nuk janë në konflikt interesi sepse si kryetarë mund të kryejnë funksionin e deputetëve.

Ata i referohen nenit 12 të Ligjit për Parandalimin e Korrupsionit, i cili përcakton se këto nuk janë funksione të papajtueshme.

“Sepse puna që kryen zyrtari publik si kryetar sipas nenit 12 paragrafi 3 të Ligjit për APK-në nuk i përket punës së kryer në administratën shtetërore…por sipas Ligjit për Vetëqeverisjen Lokale, i takon organit të vetëqeverisjes lokale”, thekson APK.

Gjeloshaj tha për RTMZ se më herët kishte theksuar se në bazë të ligjit dhe Kushtetutës, deputet mund të jetë edhe kryetari i komunës.

Ai pohoi se APK-ja nuk ka bazë ligjore për të nisur procedurën dhe se nuk është shkelur ligji.

“Shqetësimi i disa OJQ-ve dhe mediave për këtë çështje tregoi një mosnjohje të madhe të rregulloreve bazë që ata mbrojnë, por kjo është pyetje dhe përgjegjësi për ta. Prandaj, APK-ja nuk po kryen procedurë kundërvajtëse ndaj meje, sepse nuk ka asnjë bazë për këtë”, ka thënë Gjeloshaj.

Nëse vendosin të mbulojnë të dy funksionet, deputetët dhe kryetarët e bashkive nuk kanë të drejtë të dyfishojnë të ardhurat, por fitojnë të drejtën e diferencës në raport me të ardhurat më të larta.

Kujtojmë se APK-ja ka iniciuar procedurë kundër kryeministrit Dritan Abazoviq dhe tetë zyrtarëve publikë nën dyshimin se kanë shkelur Ligjin për Parandalimin e Korrupsionit, i cili i referohet kufizimeve në ushtrimin e funksioneve publike.