Shefi i diplomacisë malazeze Srgjan Darmanoviq ka thënë se Mali i Zi ka marrëdhënie të shkëlqyeshme me vendet fqinje. Duke folur për atë që në mediet serbe e ruse është paraqitur si “ide e Shqipërisë së madhe”, Darmanoviq agjencisë sllovake të lajmeve Tasr, i ka thënë: “Kemi marrëdhënie të shkëlqyeshme me të gjithë fqinjët, përfshirë Shqipërinë, Kosovën dhe Maqedoninë. Mendoj se në viset tona shumë flitet në kuadër të fushatës zgjedhore për të tërhequr votues. Shqipëria është anëtare e NATO-s, e sheh shumë qartë të ardhmen e vet në Bashkimin Europian. Po ashtu edhe Kosova e Maqedonia qëllimin kryesor e kanë të bëhen anëtare të BE-së e të NATO-s. E ne do të jemi anëtar i kësaj aleance që nga 5 qershori”, ka thënë Darmanoviq.