Tërmetet e dy ditëve të fundit që goditën pjesën qëndrore të Shqipërisë, kanë lënë pas 105 të plagosur dhe rreth 600 ndërtesa të dëmtuara, por fatmirësisht nuk ka pasur viktima. Pas tërmetit kryesor prej 5.8 ballë Rihter që ndodhi ditën e shtunë, më pas janë ndjerë edhe 340 lëkundje të tjera, kanë njoftuar nga Instituti shqiptar për shkenca gjeologjike. Kryeministri Edi Rama njoftoi se pas tërmeteve e kanë kontaktuar liderët e vendeve të ndryshme të cilët kanë ofruar ndihmë në rast nevoje.