Punonjësit policorë të Sektorit Kundër Krimit, në vazhdim të aktiviteteve për vërtetimin dhe zbardhjen e veprave penale të lidhura me veprimtarinë e personit në kërkim ndërkombëtar, kanë dorëzuar kallëzim penal në prokurorin e shtetit në Prokurorinë Themelore të Shtetit në Kotorr kundër shtetasit turk Binal Çamgoz (40) për shkak të dyshimit se ka kryer veprën penale të nxitjes së vërtetimit të përmbajtjes së pavërtetë.
“Këtë vepër penale Çamgoz dyshohet se e ka kryer në atë mënyrë që më 9 qershor 2022, me rastin e paraqitjes së kërkesës për leje qëndrimi dhe pune të përkohshme tek zyrtarët e MPB-së – Degët për punë administrative, shtetësi dhe të huaj në Budva, kanë përdorur një dokument udhëtimi të falsifikuar të Republikës së Turqisë në emër të M.A.B., me çka ka mashtruar zyrtarët e MPB-së të cilët i kanë lëshuar leje qëndrimi të përkohshëm”, thuhet në polici.
Policia bën me dije se Çamgoz fillimisht ka kryer veprën penale të falsifikimit të një dokumenti për të cilin ishte dënuar ligjërisht, ku një dokument të tillë e ka përdorur si të vërtetë dhe më pas me të njëjtin dokument ka kryer një sërë veprash penale duke çorientuar organet e rendit – zyrtarë të Ministrisë së Punëve të Brendshme dhe persona të tjerë (zyrtarë të Regjistrit Qendror të Subjekteve të Biznesit dhe noterë), ku ka kryer vepra të reja penale duke nxitur vërtetimin e përmbajtjes së pavërtetë përmes aktiviteteve të vazhdueshme.
“Sipas ligjeve të Malit të Zi, Çamgoz nuk mund të marrë miratim për qëndrim të përkohshëm në Mal të Zi, pasi nuk plotëson asnjë nga kërkesat e Ligjit për të Huajt, gjegjësisht nuk posedon asnjë dokument identifikimi personal të vlefshëm (kartë identiteti ose dokumenti i udhëtimit) dhe kushti tjetër është që të mos jetë i dënuar ose të mos ketë procedim penal kundër tij në vendin e tij të origjinës, gjë që e paraqesin provat – lëshimi i një urdhër-arresti ndërkombëtar nga organet ligjzbatuese të Republikës së Turqisë. ”, thekson policia.
Siç shtuan ata, punonjësit e Sektorit Kundër Krimit janë duke vazhduar aktivitetet e tyre në këtë rast me qëllim të identifikimit dhe ndjekjes penale të personave të lidhur, të cilët në mënyrë të drejtpërdrejtë ose të tërthortë i kanë ofruar mbështetje logjistike personit të përmendur në realizimin e veprimtarive kriminale me qëllim arritjen e një pozite të favorshme – marrja e dokumentacionit përkatës dhe fitimi i statusit të duhur në përputhje me rregulloret ligjore pozitive të Malit të Zi.