Ish-kryeministri dhe lideri i Lëvizjes Qytetare URA, Dritan Abazoviq, është marrë në pyetje sot në Prokurorinë Themelore të Podgoricës, pasi ka pohuar publikisht se kishte informacione se kush ishte i dyshuari kryesor dhe cili ishte motivi për hapjen e tunelit dhe depërtimin e tij tek depoja e Gjykatës së Lartë të Podgoricës. Ai thotë se ka paraqitur të dhënat operative që ka pasur në kohën kur ka qenë kryeministër, por nuk mundet, tregon ai, të flasë publikisht për detaje.

“Kam dhënë deklaratë në cilësinë e dëshmitarit, shumë korrekte për prokurorin Marko Mugosha. Të pranishëm ishin edhe avokatët e personave të caktuar të akuzuar për rastin e Tunelit. Kam paraqitur të dhënat operative që kam pasur kur kam qenë kryeministër. Sigurisht që nuk mund të flas për detaje sepse do të shkel ligjin. Ata që janë përgjegjës kanë mundësinë t’i kërkojnë Qeverisë ose kujtdo që të heqë shenjën e fshehtësisë nga disa dokumente dhe kjo mund të jetë e dobishme për ta,” u tha Abazoviq gazetarëve pas seancës.

I pyetur se pse ka pritur të shpallë gjetjet e tij deri më tani, Abazoviq tha se nuk ishte i ftuar.

“Nuk mund të vij vetëm. Unë i kam paraqitur të dhënat operative, nuk e di nëse ka shumë dobi apo jo, por me shumë kënaqësi mund ta ndaj me autoritetet atë që di”, ka deklaruar Abazoviq.

Mirëpo, Abazoviq vetëm së fundmi ka njoftuar se ka njohuri operative për rastin.

“Këtë informacion e kanë edhe autoritetet tjera kompetente në Mal të Zi”, thekson Abazoviq.

Gazetarët u interesuan gjithashtu nëse gjetjet e tij shfajësojnë dikë nga faji.

“Absolutisht jo. Kë mund të shfajësonin! Mendoj se është në interes të publikut që të dijë gjithçka për rastin. Një numër i caktuar i personave janë nën hetim, disa janë arrestuar, por i gjithë opinioni është i interesuar se kush janë autorët”, thekson Abazoviq.

“Unë thashë cilat janë dy teoritë kryesore që mund të jenë të mundshme”, tha Abazoviq.

Në seancë, thotë ai, ka folur për motivet e hapjes së tunelit në depon e Gjykatës së Lartë.

“Në këto dy teori kryesore, drejtimi i parë ka të bëjë me motivet e karteleve të drogës në Mal të Zi”, thekson Abazoviq.

I pyetur nëse beson se një nga arsyet e gërmimit të tunelit është arritja e kokainës që vendoset në të, Abazoviq theksoi se është shumë e mundur.

“Nëse dikush mendon se askush nuk duhet të mbajë përgjegjësi për 400 kilogramë kokainë dhe se ajo ka rënë nga Marsi dhe sapo është krijuar atje, të mos e besoj. Çdo gjë tjetër duhet të hetohet nga autoritetet”, tha Abazoviq.

Ai pohon se ka shkuar në vendin e krimit pasi gjithçka ka përfunduar në prani të mbi 40 pjesëtarëve të Drejtorisë së Policisë. Ai nuk beson se i ka prishur hetimet në atë mënyrë.

I pyetur se si e komenton faktin që ende nuk është bërë lista e sendeve që mungojnë në depon e Gjykatës së Lartë, Abazoviq shprehet se kjo nuk është pyetje për të, por për autoritetet.