Që nga fillimi i muajit mars, policia e vendeve fqinje ka zbuluar rreth 850 kilogramë marijuanë që ishte kontrabanduar përmes Malit të Zi. Bëhet fjalë për tre veprime, dy janë zbatuar në Kroaci dhe një në Serbi. Se ky është një fenomen alarmant dëshmon sasia e drogës së gjetur. Poashtu shtrohet pyetja se çfarë po bën policia jonë, dhe cilat janë kontrollet në kufij kur largohen nga Mali i Zi. Këto tre raste të mëdha të kontrabandës nëpër kufijtë e Malit të Zi ndodhën pasi u shkarkua Dragan Klikovac, ndihmës drejtor i Administratës së Policisë për sektorin e policisë kufitare.

Në ditët e para të marsit në Zagreb është arrestuar shtetasi malazez R.V. në furgonin e të cilit, sipas policisë, u gjetën 250 kilogramë marijuanë dhe një sasi e caktuar parash. Sipas policisë kroate dyshohet se paratë vijnë nga shitja e drogës, ndërsa lënda narkotike e konfiskuar për rishitje të mëtejshme në treg. Shtetasi ynë është arrestuar në kabinën e pagesës Luçko gjatë kontrollit të rregullt të qarkullimit.

Më pas, më 9 mars, pjesëtarët e policisë serbe në Prijepolje konfiskuan më shumë se 541 kilogramë marijuanë dhe arrestuan M.Đ. (36), i cili drejtonte kamionin në të cilin u gjet droga. Në pikën kufitare Gostun, në hyrje nga Mali i Zi në Serbi, policia ka gjetur 500 pako marihuanë në një bunker të posaçëm gjatë kontrollit të një autocisternë me targa malazeze të drejtuar nga i dyshuari.

Më në fund, në një aksion të policisë kroate u arrestua një shtetas i Malit të Zi, 22 vjeç, i dyshuar se planifikonte të kontrabandonte 55 kilogramë marijuanë. Është konstatuar se ai pardje ka hyrë ilegalisht në Republikën e Kroacisë nga drejtimi i Malit të Zi, në këmbë mbi kodrën e Koshares, pas së cilës ka marrë me qira një automjet me të cilin ka dashur të transportojë drogën në vendet e Evropës Perëndimore.